Казанда Черек күлдә шугалак ачыласы көн билгеле
(Казан, 21 декабрь, «Татар-информ», Гөлнар Гарифуллина). Казан шәһәре Башкарма комитетының Мәдәният идарәсе башлыгы Азат Абзалов Казанда Черек күлдә шугалакның кайсы көнне ачылачагын әйтте. «Көн суытуы яхшы булды. 27 декабрьдә Черек күлдә шугалак ачылачак. Бу Казанда тимераякта шуу өчен халыкның яраткан урыннарының берсе», — диде ул Хөкүмәт йортында брифингта. Азат Абзалов Казанда барлыгы 21 шугалакта прокатка тимераяклар алып булачагын әйтте. Шулай ук, Казанда 82 хоккей тартмасы әзерләнә. Анда да шуу мөмкинлеге булачак. Идарә башлыгы чаңгы базалары да инвентарь белән яхшы җиһазланганын билгеләп узды. «Яңа ел каникулында 160 тан артык массакүләм-мәдәни чаралар әзерләнгән. Урам чараларында урам театрлары да бар. Театр, музейларда, концертларда 400 ләп чара көтелә», — диде Азат Абзалов.