Ташкентта Сара Садыйкова һәм Сибгат Хәкимгә багышланган әдәби кичә узды
(Казан, 28 декабрь, «Татар-информ»). 23 декабрьдә Ташкентта танылган композитор Сара Садыйкованың тууына 115 ел тулуга, шулай ук татар шагыйре Сибгат Хәкимнең тууына 110 ел тулуга багышланган музыкаль-шигъри кичә узды. Чара Ташкент шәһәренең татар иҗтимагый мәдәни-агарту үзәге һәм Үзбәкстан Республикасы Министрлар Кабинеты каршындагы чит илләр белән милләтара мөнәсәбәтләр һәм дуслык элемтәләре буенча комитеты белән берлектә оештырылды, дип хәбәр итә Бөтендөнья татар конгрессы матбугат хезмәте. Программада Сара Садыйкованың Сибгат Хәким һәм башка татар шагыйрьләре шигырьләренә язылган танылган җырлары яңгырады. Музыкаль-әдәби кичәнең авторы һәм алып баручысы, Татарстан Республикасының атказанган мәдәният хезмәткәре, «Татар моңы» халыкара конкурсы лауреаты Римма Гыйззәтуллина Сара Садыйкова һәм Сибгат Хәкимнең тормыш һәм иҗат юлы турында сөйләде. Чарада әлеге легендар шәхесләрнең тормышы һәм иҗаты турында документаль фильмнар күрсәтелде. Кичә ахырында тамашачылар Сара Садыйкованың «Белегез шуны» җырын бергәләп җырлады