Миңнеханов: Татарстанда фән һәм мәгариф — безнең көндәшле өстенлек

(Казан, 29 декабрь, «Татар-информ»). Татарстан Президенты Рөстәм Миңнеханов югары уку йортлары ректорлары һәм республика фәнни оешмалары җитәкчеләре белән традицион Яңа ел алды очрашуын үткәрде. Чарада Татарстан фәнни-мәгариф комплексында ел нәтиҗәләре, шулай ук 2022 елга планнар турында фикер алыштылар.

2021 елда республика Россиянең фәнни-технологик үсешенә зур өлеш кертте, шуңа күрә әлеге чара — һәр өлкә вәкилен борчый торган мәсьәләләр буенча фикер алышу өчен уңайлы мөмкинлек, диде Рөстәм Миңнеханов.

Татарстан илнең инновацион төбәкләре ассоциациясендә регион территориясендә эшли торган фәнни оешмалар саны буенча лидерларның берсе, дип сөйләде Татарстан вице-премьеры Ләйлә Фазлыева.

Шулай ук республика уйлап табу активлыгы буенча субъектлар унлыгына керде. Аның сүзләренчә, соңгы өч елда «Татнефть» һәм КАМАЗ тарафыннан файдалы модельне уйлап табуга максималь күләмдә гаризалар бирелгән. Югары уку йортларыннан Казан илкүләм тикшеренү технология университеты, Казан дәүләт архитектура һәм төзелеш университеты һәм Казан федераль университеты еш катнашкан.

Шулай ук 2021 елда Татарстанда Фән һәм технологияләр елы кысаларында барлык илкүләм һәм республика чаралары үткәрелде.

Татарстан Президенты сүзләренчә, югары нәтиҗәләргә карамастан, республика ирешелгәннәрдә тукталып калырга тиеш түгел. «Безгә кайда булуыбызны аңлау, үзебезне яхшылар белән чагыштыру мөһим. Әгәр иң яхшы университетлар белән көндәшлек итмәсәк — бездә беркайчан да берни дә булмаячак», — диде ул.

Соңыннан Рөстәм Миңнеханов Татарстанның һәр югары уку йорты буенча индивидуаль стратегия әзерләргә тәкъдим итте, чөнки «фәнни-мәгариф комплексы — безнең конкурентлы өстенлек булып тора». Татарстанның төрле юнәлешләрдә (инженер, химия, спорт һәм мәдәният) потенциалы бар, шуңа күрә аның үсешен дәвам итү бик мөһим.