Алексей Песошин: Аварияле торактан күчерү программасы 2023 елда төгәлләнергә тиеш
85 торак йорт, 654 фатир, 1755 гражданин кергән программа 2019-2023 елларда гамәлгә ашырыла.
Татарстан Премьер-министры Алексей Песошин әйтүенчә, республикада аварияле торактан күчерү программасы 2023 елда төгәлләнергә тиеш. Бу хакта ул Дәүләт Советы утырышында ясаган чыгышында әйтте.
«2013-2017 еллар программалары буенча аварияле йортлар исемлегенә 2012 елның 1 гыйнварына кадәр авария хәлендәге торак дип танылган йортлар кертелгән иде. Бу 1102 йорт, 8 мең 70 фатир, мәйданы 286 мең квадрат метр. Аларда 20 мең 396 кеше яшәгән. Программа тәмам, бәясе 5 млрд сумнан артык булды», - диде Песошин.
Киләсе траншка 2017 елның 1 гыйнварына кадәр аварияле дип танылган йортлар кертелгән.
«Программа 2019-2023 елларда гамәлгә ашырыла, бу – 85 торак йорт, 654 фатир, 1755 гражданин. Бүген 2019, 2020, 2021 елларга каралган этабы үтәлде. 2022-2023 еллар өлеше калды. Казанда 11 фатирны күчерәсе калды, әлегә юридик моментлары бар, кемдер баш тарта, кемдер мирас варисы була. Татарстанның 10 районында 136 фатир исәпләнә», - дип белдерде Премьер-министр.
Программа 2024 елда төгәлләнергә тиеш, ләкин алданрак тәмамлау нияте белән аны 2023 елда ябарга җыеналар.