Төмәндә яшәүче татар нейрохирургы Монголия сабыен үлемнән коткарган
Төмән өлкәсенең «Яңарыш» сайтында Гөлнур Вәлиеваның «Төмән нейрохирурглары Монголия сабыен коткардылар» дигән язмасы чыкты.
«Төмәндә федераль нейрохирургия үзәге табиблары Монголиядән килгән малайны баш миенең күп өлешен алып торган күләмле кистадан коткардылар. Хирургларның профессионализмы һәм алар куллана торган технологияләр авыруны дәвалау вакытын нык кыскартты», - дип хәбәр итә үзәкнең матбугат хезмәте.
Сабый Тэмуужин әти-әнисе белән Улан-Баторда яши, операциягә кадәр көчле баш авыртуларына зарлана. Баш миенең зур өлешен биләп торган күләмле кистаның бу авыртуларны китереп чыгаруы ачыклана. Монгол табиблары аның әти-әнисенә тиз арада операция ясарга кирәклеген белдерәләр. Баланы коткарып калмаска да мөмкин, дип аңлаталар һәм дәвалауда аз травма бирә торган методикалар һәм уникаль технологияләр кулланыла торган Төмән федераль нейрохирургия үзәгенә мөрәҗәгать итәргә киңәш итәләр.
Үзәкнең баш табибы, профессор Альберт Әкрам улы Суфианов эндоскопик җиһазлар кулланып операцияне уңышлы үткәрә. Кистаны малайның сәламәтлегенә зыян китерми генә алып ташлый ул.
Альберт Суфианов Монголия белән тыгыз һөнәри бәйләнештә булуын сөйли. Ул анда тәҗрибә алмашу буенча берничә тапкыр барган. Бу илдән килгән күп балаларны Иркутсктагы балалар хастаханәсенең нейрохирургия бүлегендә дә дәвалаган.
«Без хезмәттәшлек өчен ачык, төрле илләрдән килгән пациентларны федераль нейрохирургия үзәгенә оператив дәвалау өчен кабул итәргә әзер. Безнең клиниканың мөмкинлекләре зур. Без авторлык методикаларына ия. Еш кына пациенттан башкала хастаханәләрендә баш тарталар, ә без аңа шанс бирәбез һәм тормышын коткарабыз«, - дип сөйләде Альберт Суфианов.