Нефтьчеләр Аксубайның Түбән Балан авылы балаларына уен мәйданчыгы бүләк итте
Аксубайның Түбән Балан авылында балаларына авылда «ТАТЕХ» акционерлык җәмгыятеннән бүләк – матур балалар уен мәйданчыгы пәйда булды.
Уен комплексын авыл үзәгендә, мәктәп һәм балалар бакчасы бинасы каршында урнаштырдылар. Ул балаларны һәм авыл кунакларын үзенә тартып тору үзәгенә әверелде. Бу турыда «Авыл таңнары» сайтында хәбәр ителә.
«ТАТЕХ» ЯАҖ генераль директоры Ирек Хәйруллин белән район башлыгы Камил Гыйльманов балалар мәйданчыгының ничек урнашуын шәхсән үзе карарга килде. Яңа объектта күңелле атмосфера хөкем сөрде: төрле яшьтәге дистәләрчә бала тауда шуды, таганда атынды, баскычтан менде, яшь әниләр сабыйларын таганда атындырды.
«Ирек Хәйруллин җитәкчелегендәге нефть компаниясе – социаль юнәлешле предприятие. Ул халыкның ихтыяҗларын белә һәм безгә мәктәпләр, социаль учреждениеләр, сәламәтлек саклау объектларын ремонтлауда актив ярдәм итә», – диде Камил Гыйльманов.
Ирек Хәйруллинга башлангыч мәктәп-балалар бакчасы директоры Ольга Копонева чын күңелдән рәхмәт белдерде.