Казанда җиде автомобиль тәрәзәсен ваткан җинаятьчене эзлиләр
Узган ял көннәрендә Казанда берьюлы җиде кеше полициягә мөрәҗәгать иткән. Алар машиналарының тәрәзәсен билгесез кеше ватуы турында әйткән. Бу хакта «Татар-информ» агентлыгына Россия Эчке эшләр министрлыгының Казан идарәсе матбугат хезмәтендә хәбәр иттеләр.
Әлеге хәл узган шимбәдә Рәис Гәрәев урамындагы бер йорт ишегалдында булган. Җинаятьче машина тәрәзәләрен ваткан.
Хәзер полиция хезмәткәрләре шаһитларны сораштыра. Урамдагы видеокүзәтү камераларыннан язмалар алынган. Автомобильләргә зыян китерүдә катнашы булган кешеләрне эзлиләр.