Чүпрәле районы Зур Чынлы авылында яңа имам-хатыйб сайланды
Чүпрәле районы Зур Чынлы авылында яңа имам-хатыйб сайланды. Зөлхиҗҗә аеның 29нчы көнендә район мөхтәсибе Данир хәзрәт Шәрәфетдинов һәм мөхтәсибәтнең оештыру бүлеге җитәкчесе Фәргать Нәүмәтов Зур Чынлы авылында мәчеттә булды.Чараның максаты мәхәллә халкы белән очрашу, авыл имам-хатыйбы Барис хәзрәтнең үз вазифаларыннан азат итүне сорап язган гаризаны карау иде.
Район мөхтәсибе Данир хәзрәт Шәрәфетдинов Барис хәзрәткә дини юнәлештәге хезмәте өчен олы рәхмәтләрен белдереп, Татарстан мөфтие Камил хәзрәт Сәмигуллинның Рәхмәт хатын тапшырды. Авылның яңа имам-хатыйбы итеп, мәхәллә халкы тарафыннан Җәмил Фатхуллов сайланды. Аңа эшендә уңышлар, исәнлек теләделәр. Бу хакта «Туган як» сайтында хәбәр ителә.
Чарада авыл җирлеге башлыгы Фаил Фатхуллов та катнашты. Ул Барис хәзрәткә авыл җирлеге исеменнән рәхмәт әйтте һәм Рәхмәт хаты белән бүләкләде. Яңа сайланган имам-хатыйб белән тыгыз хезмәтчәнлеккә өмет баглады.
Барис хәзрәт Таһиров озак еллар дәвамында Зур Чынлы авылы мәчетендә имам-хатыйб вазифаларын үти. Хәзрәтнең авыл зиратларын, мәчетне тәртиптә тотуда да роле зур. Язын-көзен мәңгелек йортта аның җитәкчелегендә өмәләр уза, аларда авыл халкы, яшьләр катнаша. Дини бәйрәмнәрне оештыру да матур гадәткә кергән.