Уфада Дан бульварындагы аллеяга Муса Гәрәев исемен бирергә тәкъдим иттеләр
Уфада яшәүчеләргә Дан бульварындагы аллеяны ике тапкыр СССР Герое, легендар очучы-штурмовик Муса Гәрәев исемен рәсми рәвештә атау өчен тавыш бирергә тәкъдим иттеләр. Бу хакта «Башинформ» агентлыгы яза.
Башкала мэриясендә хәбәр итүләренчә, әлеге инициативаны, муниципалитетның ufacity.info сайтында теркәлеп, опрос.уфа.рф мәйданчыгында хупларга мөмкин. Тавыш бирү 28 октябрьгә кадәр дәвам итәчәк.
«Шәһәрдә Дан бульварындагы аллеяны тәртипкә китерү эшләре төгәлләнеп килә – яңартылган иҗтимагый киңлек аның үзәк өлешен били һәм Октябрь проспектын урман-парк зонасы белән тоташтыра. Әлеге территориядә Муса Гәрәевкә бронза бюст куелган инде. Скульптура федераль әһәмияткә ия мәдәни мирас объекты санала», - диелә Уфа шәһәре хакимияте хәбәрендә.