Түбән Кама егетләре ялдан соң махсус хәрби операция зонасына юл тотты

Түбән Кама сугышчылары ике атналык ялдан соң, кабат махсус хәрби операция зонасына китте. Аларны туганнары һәм якыннары озатырга килде. Бу хакта Түбән Кама муниципаль районы рәсми сайтында хәбәр ителә.

 «Яхшы ял иттек. Ниһаять, хатыннарны, балаларны, ата-аналарны күрдек һәм кочакладык. Дөрес, ял көннәре сизелмичә дә үтеп китте. Ләкин безгә кире кайтырга вакыт, анда безне башка хезмәттәшләр көтә һәм аларга безнең ярдәм кирәк», – диде хәрбиләр. Хәрбиләр туган йортларыннан икенче тапкыр китү күпкә авыррак булуын да әйтте.

Егетләр Түбән Кама мэрыннан шәхси очрашуда автобус бирүләрен сораган иде. Рамил Муллин аларның үтенечен хуплады һәм транспорт бирде.

«Командование куйган барлык бурычларны үтәп, исән–сау әйләнеп кайтыгыз. Мин сезгә рухи яктан сынмаска, сезнең юлда булачак барлык сынауларны үтеп чыгуыгызны һәм туганнарыгызның ярдәм итүен телим. Ышанырга, үзеңне сакларга һәм һәрвакыт изге эш башкарганыңны белергә кирәк. Уңышлар сезгә, егетләр!» – диде Түбән Кама шәһәре һәм Түбән Кама муниципаль районы хәрби комиссары Газинур Ситдыйков.

«Бүген монда басып торуыгыз өчен зур рәхмәт. Сез - безнең горурлыгыбыз. Без сезгә дә, гаиләләрегезгә дә мөмкин кадәр ярдәм итәчәкбез. Киләсе очрашуыбыз тулы составта булыр, дип өметләнәбез. Без сезне бик көтәбез!» – диде Түбән Кама муниципаль районының мобилизацион әзерлек һәм халык иминлеге бүлеге башлыгы Раил Габидуллин.