Фатирын арендага бирүче пенсионерларга социаль өстәмә түләүләр бирелмәскә мөмкин
Фатирын рәсми рәвештә арендага бирүче Россия пенсионеры, айлык кереме төбәк яшәү минимумы күләменнән артып киткән очракта, пенсиясенә социаль өстәмә бирелмәскә мөмкин. Бу хакта РИА Новости агентлыгы юристларга сылтама белән хәбәр итә.
Гамәлдәге закон нигезендә, картлык буенча түләнә торган пенсия күләме тулаем алганда Россия һәм аерым төбәкләр өчен исәпләнә торган яшәү минимумыннан кимрәк булмаска тиеш. Әгәр пенсия Россия буенча яшәү минимумы күләменә җитмәсә, ул чагында пенсионер федераль өстәмә ала, социаль яклау органнары исә төбәкләр түләгән социаль өстәмә суммасы пенсияне пенсионерның яшәү минимумы дәрәҗәсенә җиткерүен тәэмин итәргә тиеш, дип искәртте юрист Елена Родионова.
«Пенсионер фатирын рәсми рәвештә арендага бирә һәм аның айлык кереме төбәк яшәү минимумы күләменнән артып китә икән, бу очракта ул пенсиясенә социаль өстәмәдән колак кагарга мөмкин», - дип кисәтте ул.
Моннан тыш, аңа, мисал өчен, торак-коммуналь хуҗалыгы хезмәтләрен түләү өчен субсидия дә бирелмәскә мөмкин. Чөнки аренда түләвеннән кергән керем пенсионерның милек хәлен билгеләгән вакытта исәпкә алына, диде юрист.