Лениногорск кешесе мошенникларга 1 миллионга якын сум акчасын биргән

Лениногорскида яшәүче ир-атны мошенниклар алдап, 900 мең сум акчасын алган. Алар моның белән генә тынычланмыйча, икенче көнне янә шалтыратканнар. Бу хакта «Заман сулышы» сайтында хәбәр ителә.

57 яшьлек ир-атның телефонына мессенджер аша хокук саклау органнары эмблемасы белән шалтырату килгән. Шалтыратучы үзен эчке эшләр хезмәтеннән дип таныштырган. Ул ир кешенең исеменә билгесез кешеләрнең кредит рәсмиләштерергә җыенуын хәбәр иткән. Аларның бу законсыз эшләрен булдырмый калу өчен банк бүлекчәсенә барырга һәм 900 мең сумлык кредит рәсмиләштерергә кирәклеген әйткән. Моннан тыш, әңгәмәдәше ир кешегә аферистларны тоткарлауда ярдәм күрсәтүен дә сораган.

Мошенниклар сүзенә ышанып, ялгыш юлдан киткән лениногорскилы, алар әйткән банкның иң якын бүлекчәсенә барып, кредит рәсмиләштергән һәм күрсәтелгән сумманы акчага әйләндергән. Аның белән телефоннан даими аралашып торган «хокук сакчысы» банкның бу бүлегендә ир кешенең исеменә кредит алырга җыенучылар табылмаганлыгын белдергән. Шуңа күрә банкның күрше шәһәрдәге бүлекчәсенә баруын сораган.

Җинаятьчеләрне тоткарлау операциясе күрше шәһәрдә дә уңышсызлыкка очрагач, акчаны «куркынычсыз исәпкә» күчереп торырга кушканнар. Зыян күрүче шулай эшләгән дә. Икенче көнне ир кешегә шул ук «хезмәткәр» янә шалтыратып, инде башка банктан 2 миллион сумлык тагын бер кредит рәсмиләштерү кирәклеген әйткән.

Лениногорскилы берни дә аңламыйча тагын банкка барып, гариза биргән. Бәхетенә, бу банкның чын иминлек хезмәткәре белән аралашырга туры килгән. Аның белән сөйләшкәннән соң гына ир кеше ике көн дәвамында аферистлар тоткынлыгында булуын аңлаган.

Бу факт буенча мошенниклык турында җинаять эше кузгатылган