Миңнеханов: Татарстан тормышында муниципалитетларның роле бәяләп бетергесез

Татарстан тормышында муниципалитетларның роле бәяләп бетергесез - алар база, нигез булып тора. Бу хакта Татарстан Республикасы Рәисе Рөстәм Миңнеханов Җирле үзидарә көненә багышланган тантаналы чарада әйтте.

Республика җитәкчесе муниципаль бергәлек вәкилләрен һөнәри бәйрәмнәре белән котлады. Бу хакта республика җитәкчесенең матбугат хезмәте хәбәр итә.

«Җирле хакимият идарә системасында кешеләр өчен һәрвакыт иң якын һәм аңлаешлы звено булды һәм булып кала. Федераль хакимият тә, төбәк хакимияте дә - алар беренче чиратта һәрвакыт сезгә мөрәҗәгать итә. Сез социаль үсешнең, торак-коммуналь хуҗалыкның, юл-транспорт һәм башка өлкәләрнең төрле юнәлешләрендә көндәлек тормышның мөһим проблемаларын хәл итү өчен җаваплы», - диде Татарстан Рәисе.

Ул билгеләп үткәнчә, җирле хакимиятләрнең җаваплылыгы зонасында шәһәр һәм районнарның, авыл җирлекләренең тотрыклы эшчәнлеген тәэмин итү, алга таба гражданнарның тормыш сыйфатын яхшырту, икътисадны алга таба үстерү, барлык социаль йөкләмәләрне үтәү, кече һәм урта бизнеска ярдәм итү мәсьәләләре кала.

«Әлеге бурычларны уңышлы тормышка ашыру өчен без илкүләм проектларны, федераль һәм республика программаларын гамәлгә ашырабыз. Дәүләт дәрәҗәсендә социаль-икътисади үсеш темпларын һәм гражданнарыбызның тормыш дәрәҗәсен саклау өчен барлык кирәкле чаралар күрелә», - дип билгеләп үтте Рөстәм Миңнеханов. - Һичшиксез, күп нәрсә җирле хакимият органнарының нәтиҗәле эшләвенә бәйле. Шуңа күрә без җирле үзидарәнең нәтиҗәлелегенә зур игътибар бирәбез».

Татарстан Рәисе республика дәүләт бүләкләрен тапшырды. Шулай ук ТР муниципаль районнары һәм шәһәр округлары башкарма комитетларына автомобильләргә сертификатлар тапшырылды.

Чара «Корстон» кунакханә, сәүдә һәм күңел ачу комплексы мәйданчыгында узды, анда Татарстан Рәисе Администрациясе җитәкчесе Әсгать Сәфәров, «Татарстан Республикасы Муниципаль берәмлекләре советы» ассоциациясе рәисе Әгъзам Гобәйдуллин катнашты.