Рөстәм Миңнеханов районнарга янгыннар белән бәйле хәлне катгый контрольдә тотарга кушты

Татарстан Рәисе Рөстәм Миңнеханов үлән һәм чүп-чар янган районнарда янгын иминлеген тәэмин итү вазгыятен катгый контрольдә тотарга кушты. Бу хактаа Татарстан Хөкүмәте Йортында шимбә киңәшмәсендә Россия Гадәттән тыш хәлләр министрлыгының Татарстан буенча Баш идарәсе башлыгы Рафис Хәбибуллин доклад ясады.

Хәбибуллин искәрткәнчә, 2023 елның 17 апреленнән 10 маена кадәр республикада янгынга каршы махсус режим, шулай ук кайбер чикләүләр кертелә, шул исәптән коры үләнне һәм чүп-чарны яндыруны бөтен төбәкнең территориясендә тыю. Шулай ук Министрлар Кабинеты гражданнарның урманнарда булуын, транспорт белән керүне һәм эшнең билгеле бер төрләрен 2023 елның 15 апреленнән 5 маена кадәр чикләде.

«Вазгыять катлаулы. Үлән, коры үсемлек, чүп-чар янганда барлыгы 35,5 гектар мәйданда 590 янгын булды. Узган ел 0,2 гектар мәйданда 49 янгын чыккан иде. Коры үлән янганнан торак төзелешенә, гражданнарның хуҗалык корылмаларына күчүнең 3 очрагы бар. 15 корылма, 14 торак йорт, 3 торак булмаган йорт, 8 хуҗалык корылмасы юк ителгән», - дип сөйләде Хәбибуллин.

Ул шулай ук күптән түгел генә янгын теркәлгән районнарны да әйтте. 10 апрельдә Актанышта, 14 апрельдә Мамадышта, 15 апрельдә Яшел Үзәндә янгын чыкты.

«Узган атнада 25 га мәйданда үлән янганнан 147 ландшафт янгыны булды. Янгыннарның төп өлеше 6 муниципаль районга туры килә, аларга 147 ландшафт янгынының яртысы туры килә. «Антилидерлар»да бездә ел саен гадәттәгечә Түбән Кама районы тора. Шулай ук Тукай районы, Әлмәт, Чирмешән, Яңа Чишмә, Зәй районнары да бар. Районнар белән без эшлибез, кайсылары белән аңлашабыз, кайберләре белән юк», - диде докладчы.

Рөстәм Миңнеханов районнар арасында узган ел да «аерылып торучылар» булуга игътибарны юнәлтте һәм нинди муниципаль берәмлекләрнең үз территориясендә үлән, чүп-чар янганын ачыклауны сорады.

«590 янгынның биштән бер өлеше Түбән Кама районына туры килә», - дип җавап бирде Хәбибуллин.

Татарстан Рәисе видеоэлемтә аша Түбән Кама һәм Тукай районнары җитәкчелеге белән аралашты һәм бу мәсьәләдә тәртип урнаштырырга кушты.

«Катгый җәза бирергә», - дип белдерде ул. Шулай ук, гадәттән тыш хәлләрне кисәтү һәм бетерү, янгын иминлеген тәэмин итү буенча комиссия утырышларын уздырырга, шулай ук барлык күрсәтмәләрнең төгәл үтәлүен күзәтергә кушты.