Миңнеханов Казанда һәм республика районнарында чүп чыгару проблемасын хәл итәргә кушты
Казанда һәм республиканың кайбер районнарында чүп-чарны вакытында чыгармау белән проблема бар, бу темага халыктан күп шикаятьләр һәм мөрәҗәгатьләр килә. Татарстан Рәисе Рөстәм Миңнеханов ТР Министрлар Кабинетында узган киңәшмәдә шикаятьләргә мөмкин кадәр тизрәк җавап биреп, мәсьәләне хәл итәргә чакырды.
Миңнеханов әйтүенчә, иң күп мөрәҗәгатьләр Казан, Лаеш, Питрәч һәм Кукмара районнарында яшәүчеләрдән һәм эшмәкәрләрдән килә.
«Бу хакта сөйләштек инде. Кызганыч, бу хәл дәвам итә. Рөхсәтсез чүплекләр, чүп-чарны чыгару өчен бәяләрне арттыру ...<... > Бу вакытлы күренеш икәнен аңлыйм, әмма тиз хәл итәргә кирәк. Бездә контроль, исәпкә алу системалары бар. Барысын да күрәбез, тик барын да тиз хәл итәргә кирәк», – диде Миңнеханов. Ул бу проблеманы ТР Төзелеш һәм ТР Экология министрлыкларына йөкләп, хәл итәргә кушты.
ТР Төзелеш министрлыгы башлыгы Марат Айзатуллин Татарстанда территорияләрне чистарту буенча икеайлык кысаларында Дәүләт төзелеш күзәтчелеге инспекциясе 19 хокук бозуны ачыклаганлыгын әйтте. Иң күп очрый торган тәртипсезлекләргә җитештерү һәм куллану калдыкларын җыю урыннарын тиешенчә төзекләндермәү, мәйданчыклардан чүп-чарны вакытында чыгармау һәм төзелеш техникасы тәгәрмәчләрен юу пунктлары булмау керә, дип хәбәр итә ТР Рәисе матбугат хезмәте.