Рөстәм Миңнеханов Татарстан Рәисенең вәкаләтләрен киңәйтә торган указны имзалады
Татарстан Рәисе Рөстәм Миңнеханов республика башкарма хакимият органнары системасына һәм структурасына нәрсәләр керүен билгели торган указны имзалады. Документ хокукый мәгълүмат порталында урнаштырылган.
«ТР башкарма хакимият органнары системасына Татарстан Республикасы Башлыгы (Рәис), кыскартылган атамасы – ТР Рәисе; ТР Министрлар Кабинеты; ТР министрлыклары, ТР дәүләт комитетлары; башкарма хакимият органнары структурасындагы бүтән башкарма хакимият органнары керүен билгеләргә», - диелә документта.
Шул рәвешле, указ ТР Рәисе вәкаләтләрен киңәйтә. Әгәр элегрәк башкарма хакимият органнары системасын – Дәүләт Советы, ә структурасын Татарстан Президенты билгеләсә, хәзер исә системаны һәм структураны раслау республика Рәисе карамагына тапшырылган.
Искәртеп узабыз, республика җитәкчесенең вәкаләтләрен киңәйтә торган закон проектын Дәүләт Советы депутатлары Татарстан парламентының 43нче утырышында кабул итте.