Новости за 18.05.2023

Бүген Питрәч районы Чыты авылы мәдәният йорты директоры Миннур Шәмсетдинов Халыкара музейлар көне уңаеннан ачык һавада музей оештырды. Ул ун ел дәвамында бөтен районнан тарихи экспонатлар җыя. Коллекциянең бер өлешен үз өендә, калганнарын мәдәният йортында саклый. Бу хакта «Алга» газетасы хәбәр итә.

Самара өлкәсе Шынталы муниципаль районының Денис авылында татар халкының милли бәйрәме Сабантуй 10 июньдә була. Бәйрәм 12 сәгатьтә башлана, дип хәбәр итә «Самар татарлары» сайты.

Татарстанга Рязань өлкәсенең нәсел хуҗалыгыннан голштин токымлы 462 баш тана кайтардылар. Карантин чараларын узганнан соң, хайваннар «Степановка» сөт-товар комплексына күчереләчәк, хәзерге вакытта анда төзелеш эшләре тәмамланып килә. Бу турыда Татарстан Авыл хуҗалыгы һәм азык-төлек министрлыгы хәбәр итте.

Иртәгә, 19 майда, Татарстанда моңа кадәр урнашкан җылы һава торышы сакланачак. Бу хакта Татарстанның Гидрометеорология үзәге хәбәр итә.

Массакүләм мәгълүмат чаралары төрле телләрдә уңышлы эшләсен өчен редакторлар, онлайн режимда булса да, даими рәвештә очрашырга тиеш, дип саный танылган төрек журналисты, «Анадолу» агентлыгының (Төркия) чит ил тапшыруларының баш мөхәррире Эрман Юксель. Бу турыда ул «KazanForum»ның «Тотрыклы үсеш һәм икътисади алга бару өчен медиахезмәттәшлек» сессиясендә әйтте.

Казан федераль университетының Халыкара мөнәсәбәтләр институты директоры Рамил Хәйретдинов сүзләренчә, көнчыгыш археография төркеменә бюджет хисабына 25 абитуриент алыначак.

Уфа 26-28 май көннәрендә узачак «Китап-Бәйрәм» халыкара китап ярминкәсенә әзерләнә.

Германиядә татар хатын-кызларының «Ханым» берлегендә милли ашларга багышланган кичәдә чәкчәк әзерләгәннәр.

БүгенТатарстан Республикасы Рәисе Рөстәм Миңнеханов Үзбәкстан Республикасы Премьер-министры урынбасары Җәмшид Хоҗаев белән КazanForum мәйданчыгында очрашты.

Бүген KazanForum кырында Россия Федерациясе Хөкүмәте Рәисе урынбасары Марат Хөснуллин Төркмәнстан Министрлар Кабинеты каршындагы Транспорт һәм коммуникацияләр агентлыгы генераль директоры Мәммәтхан Чакыев белән очрашты. Очрашуда Татарстан Республикасы Президенты Рөстәм Миңнеханов катнашты. Бу турыда Татарстан Рәисенең матбугат хезмәте хәбәр итте.

Россия Федерациясе мөселманнары Диния нәзарәте рәисе мөфти шәех Равил Гайнетдин фикренчә, татар милләтенә бүген Шиһабетдин Мәрҗани, Хөсәен Фәезханов кебек дин белгечләре, мәгърифәтчеләр җитми.

«Татмедиа» республика агентлыгы җитәкчесе Айдар Сәлимгәрәев һәм Ислам хезмәттәшлеге оешмасының (ИХО) Мәгълүмат агентлыклары союзы (UNA) генераль директоры Мөхәммәт Абдраббо Альями хезмәттәшлек турында меморандум имзалады. Имзалау KazanForum кысаларында «Россия – Ислам дөньясы: тотрыклы үсеш һәм икътисади алга бару өчен медиахезмәттәшлек» сессиясендә узды.

Татарстан Рәисе Рөстәм Миңнеханов чит илләрнең Россиядәге гадәттән тыш һәм тулы вәкаләтле илчеләре белән очрашты. «Россия – Ислам дөньясы: KazanForum» халыкара икътисади форумы кысаларында узган очрашуда 30дан артык илдән дипломатлар катнашты. Очрашу барышында Татарстан Республикасы Рәисе хезмәттәшлекне тирәнәйтергә, шул исәптән ислам бизнесы белән үзара бәйләнеш механизмнарын эшләргә чакырды.

Тарих фәннәре докторы, «Туган җир» журналы баш мөхәррире Дамир Исхаков «Хөсәен Фәезханов һәм Шиһабетдин Мәрҗани - бөек галимнәр, дин белгечләре һәм мәгърифәтчеләр» дип исемләнгән VIII Россиякүләм фәнни-гамәли конференциянең секциясендә катнашты. Чара Шиһабетдин Мәрҗани исемендәге Тарих институтында узды.

Шәригать стандартлары буенча матурлык һәм сәламәтлек мәсьәләләре, шулай ук ислам модасы трендлары турында бүген «Россия – Ислам дөньясы: KazanForum» XIV халыкара икътисади форумы кысаларында «Хатын-кыз карашы» трегында катнашучылар фикер алышты. Сессияләрне Татарстан Дәүләт Советының «Мәрхәмәт-Милосердие» берләшмәсе хатын-кыз депутатлары оештырды. Сессиядә катнашучыларны Республика җитәкчелеге исеменнән төбәк парламенты җитәкчесе Фәрит Мөхәммәтшин сәламләде.

Бүген борынгы уку йорты бинасының бер өлеше сакланган.

Казан федераль университетындагы күргәзмә 4 июньгә кадәр дәвам итәчәк.

Арча районы Казанбаш авылы мәктәбенә Татарстанның халык язучысы Гариф Ахунов исеме бирелде. Шул уңайдан Казанбаш авылы мәктәбендә оештырылган тантанага әдипнең кызы Наилә Ахунова, бертуганы Сания Ахунова һәм Татарстан Язучылар берлеге делегациясе барды.

Татарстан Республикасы Рәисе Рөстәм Миңнеханов Пакистан Ислам Республикасы сәүдә министры Сәед Навид Камар белән очрашты. Очрашу «Россия – Ислам дөньясы: KazanForum 2023» халыкара икътисади форумы кысаларында узды.

ТР Премьер-министры урынбасары, Бөтендөнья татар конгрессының Милли шура рәисе Васил Шәйхразыев фикеренчә, дин галимнәре Шиһабетдин Мәрҗани, Хөсәен Фәезханов белән горурлану, аларның исемен мәңгеләштерү – милләтне дә мәңгеләштерү, дигән сүз.

Бүген Татарстанга Мәскәү һәм бөтен Русь Патриархы Кирилл килде. Казан аэропортында аны республика Рәисе Рөстәм Миңнеханов каршы алды.

18 май Кырымда кырымтатар халкы сөргененә 79 ел тулуны искә алып матәм чаралары үтте. Сөрген корбаннарын искә алу чараларын күпләп җыелып үткәрмәскә кушылса да, кырымтатарлар урамнарга чыкты.

Татарстан Россия-Гарәп Әмирлекләре мөнәсәбәтләрен ныгытуга өлеш кертә, дип белдерде Татарстан Рәисе Рөстәм Миңнеханов. Ул бу турыда Россия Федерациясе вице-премьеры Марат Хөснуллин һәм Берләшкән Гарәп Әмирлекләренең тышкы сәүдә дәүләт министры Тани Әхмәт Әл Зейуди белән очрашуда әйтте. Очрашу бүген «Россия-Ислам дөньясы: KazanForum» халыкара икътисади форумы кысаларында узды.

Fashion Iftar проектын оештыручы һәм аның җитәкчесе Җәннәт Минһаҗева мөселман киемнәре эшли торган чит ил дизайнерларына уртак эш перспективалары турында фикер алышу тәкъдиме белән мөрәҗәгать итте. Бу турыда ул KazanForum кысаларында әйтте.

Аларга Европа берлеге карашыннан башка качак статусы бирә алмыйлар диелә.