Бәһрәйннең 2022 елгы Галәм гүзәле KazanForum икътисади форумының модераторы булачак
Россия, Төркия, Берләшкән Гарәп Әмирлекләре, Һиндстан, Бәһрәйн, Сербия, Казахстан, Үзбәкстан, Азәрбайҗан һ.б. илләрнең танылган эшкуарлары һәм хатын-кыз экспертлары «Россия - Ислам дөньясы: KazanForum 2023» Россия һәм Ислам хезмәттәшлек оешмасы Халыкара икътисади форумы дискуссияләрендә катнашырга теләк белдерде.
Бәһрәйннең 2022 елгы Галәм гүзәле Эвлин Абдулла-Хәлифә шәригать стандартлары буенча матурлык индустриясен үстерү турындагы трекның үзәк дискуссиясе модераторы булачак. Косметика сәнәгате, матурлык һәм сәламәтлек хезмәтләре хәләл-юнәлештә үсеш кичерә. Хәләл стандартлары буенча сертификатлаштырылган үз-үзеңне карау-тәрбияләү чаралары арта, матурлык салоннары һәм медицина клиникаларында хәләл-хезмәтләр барлыкка килә. Хәләл мейкап-индустриядә нинди трендлар формалашкан? Хәләл-фитнес нәрсә ул? Мөселман хатын-кызларының ялын ничек дөрес оештырырга? Хәләл-медицинаны үстерүнең нинди перспективалары бар? Бәһрәйн гүзәле форумда әлеге һәм башка мәсьәләләр хакында фикер алышырга тәкъдим итәчәк.
Трекның «Хатын-кыз эшкуар: гаилә һәм бизнес» дигән икенче бер төп дискуссиясендә Берләшкән Гарәп Әмирлекләренең Хатын-кыз эшкуарлар советы Президенты Фәридә Әл-Авадхи һәм «Wildberries» компаниясе генераль директоры Татьяна Бакальчук кебек танылган хатын-кыз спикерлар үзәктә булачак.
«Бүгенге шартларда җәмгыять тормышының төрле өлкәләрендә Россия һәм ислам илләре хатын-кызлары арасындагы халыкара хезмәттәшлекне үстерү аеруча мөһим», - дип искәртте Татарстанның Инвестицион үсеш агентлыгы җитәкчесе Талия Миңнуллина.