Казанда Бөек Җиңүнең 78 еллыгына багышланган хәрби парад башланды
Бу минутларда Казанның Меңьеллык мәйданында Бөек Җиңүнең 78 еллыгына багышланган хәрби парад башланды.
Бирегә Татарстан Рәисе Рөстәм Миңнеханов ретроавтомобильдә килде, машинаның тәрәзәсенә аның туган абыйсы Галимҗан Миңнехановның портреты беркетелгән. Парадта шулай ук республиканың беренче Президенты, ТР Дәүләт Киңәшчесе Минтимер Шәймиев һәм башка рәсми затлар катнаша.
Тантана башында Казанның Хезмәт батырлыгы шәһәре икәне искәртелде. Аннан соң мәйданга Россия һәм Татарстан әләмнәре, Җиңү байрагы чыгарылды.
Парад барышында Мәскәүдә Кызыл мәйданда уза торган хәрби парадтан күренешләр экраннан тәкъдим ителә.