Чистай районы үзәгендә төрле алмагач утырттылар
Чистайда агачлар утырту буенча акция булып узды. Үзәк универмаг янындагы фонтан янындагы скверда алмагачлар утырттылар. Бу хакта «Чистай-информ» хәбәр итә.
Әлеге акциядә муниципаль район башлыгы Дмитрий Иванов, республика Ветераннар (пенсионерлар) советы рәисе Хәбир Иштирәков, Ветераннар (пенсионерлар) советы әгъзалары, шулай ук Балалар йортында тәрбияләнүчеләр, 2нче номерлы гимнзиядән яшь армиячеләр катнашты.
Агачларны шулай ук коммуналь предприятие һәм бер банк учреждениесе вәкилләре дә утыртты. Соңгылары алмагачларны карап торырга вәгъдә итеп шефлыкка да алды.
«Без «Буыннар бәйләнеше» акциясе кысаларында агачлар утырту буенча чара үткәрү тәкъдиме белән чыккач, Чистай районы башлыгының хуплавына бик шат. Һәм менә без, берничә буын вәкилләре, әлеге алмагачларны утыртабыз, озакламый биредә менә дигән алма бакчасы булачак», – диде республика Ветераннар (пенсионерлар) советы рәисе Хәбир Иштирәков.
Барлык үсентеләргә дә күп итеп су сиптеләр һәм теркәделәр. Коммуналь хезмәткәрләр әйтүенчә, үсентеләр ныгып, үсеп киткәч, каккан казыкларны алачаклар.
Акция барышында төрле сорттагы 10 алмагач утыртылды.