Миңнеханов Республика көнен бәйрәм иткәндә халык иминлеген тәэмин итәргә кушты
Татарстан Республикасы һәм Казан шәһәре көненә багышланган чараларда иминлекне тәэмин итәргә кирәк. Татарстан Республикасы Хөкүмәт Йортында узган республика киңәшмәсендә Рөстәм Миңнеханов шундый йөкләмә бирде.
Алда көткән бәйрәм хөрмәтенә төп тантана чаралары 29 һәм 30 августка планлаштырыла.
«Бөтен чаралар да иң югары оештыру дәрәҗәсендә үтәргә тиеш. Традиция буенча бәйрәм мәйданчыкларында татарстанлылар һәм республика кунаклары күп булыр дип көтелә. Шуңа күрә төп бурыч – барлык куркынычсызлык чаралары белән тәэмин итү», – дип Миңнеханов сүзләрен китерә аның матбугат хезмәте.
Шулай ук Татарстан Рәисе республика халкына рәхмәтен белдерде, аларның көндәлек хезмәте аркасында Татарстан илнең терәк төбәкләренең берсе булып тора, дип билгеләп үтте.
Исегезгә төшерәбез, Казанда халык иминлеген 1,5 меңләп полиция, милли гвардия гаскәрләре, шулай ук шәхси сак предприятиеләре хезмәткәрләре күзәтәчәк. Бәйрәм мәйданчыкларында контроль-тикшерү пунктлары оештырыла.