Татарстан Дәүләт Советы Миңнехановның парламентка юлламасы датасын раслады
Татарстан Рәисе Рөстәм Миңнеханов Дәүләт Советына 14 сентябрьдә юллама белән мөрәҗәгать итәчәк. Бүген Татарстан Дәүләт Советы Рәисе Фәрит Мөхәммәтшин үткәргән республика парламенты Президиумы утырышында әлеге датаны расладылар.
«Парламентның көзге сессиясе 14 сентябрьдә 10 сәгатьтә Салих Сәйдәшев исемендәге Дәүләт Зур концертлар залында 46 нчы утырыш белән ачыла, аның кысаларында Татарстан Республикасы Рәисе Рөстәм Миңнеханов Дәүләт Советына еллык мөрәҗәгатен җиткерәчәк», — дип хәбәр итә матбугат хезмәте.
46 нчы утырышның көн тәртибендә бер генә сорау: «Татарстан Республикасы Рәисенең республиканың эчке һәм тышкы хәле турында Дәүләт Советына еллык мөрәҗәгате», — дип билгеләп үтелә хәбәрдә. Бу вакыйгага карата җәмәгатьчелектә кызыксыну зур булу сәбәпле, туры эфирда теле- һәм радиотапшыру оештырылачак.
14 сентябрьдә 12 сәгатьтә парламентның 47 нче утырышы башлана. Аның көн тәртибендә — 18 мәсьәлә, шул исәптән, 12 республика закон проекты һәм 1 федераль закон проекты.
Элегрәк «Татар-информ» язганча, Дәүләт Советының Мәгариф, мәдәният, фән һәм милли мәсьәләләр комитеты утырышында Миңнехановның парламентка юлламасы датасы хәбәр ителгән иде.