Татарстан Сәүдә-сәнәгать палатасы Кытай һәм Татарстан машина төзүчеләре очрашуын үткәрә
8 сентябрьдә Татарстан һәм Кытай компанияләре машина төзелеше продукциясен импортлау һәм экспортлау турында фикер алышачак. Очрашуны республиканың Сәүдә-сәнәгать палатасы оештыра. Бу хакта «РОСТКИ» халыкара форумы кысаларында узган матбугат конференциясендә Татарстан Сәүдә-сәнәгать палатасы рәисе урынбасары Марат Әхмәтов белдерде.
«Җентекләбрәк фикер алышу өчен без шулай ук Татарстан предприятиеләрен дә чакырачакбыз», — дип өстәде Әхмәтов.
Исегезгә төшерәбез, «РОСТКИ» беренче форумы 7-8 сентябрь көннәрендә «Казан Экспо»да уза. Чарага Россиянең 55 төбәгеннән һәм 20дән артык илдән 3,7 меңнән артык катнашучы теркәлгән. 500дән артык катнашучы — Кытай вәкилләре.
Татарстан Рәисе Рөстәм Миңнеханов билгеләп үткәнчә, форум ел саен уздырылырга мөмкин. Ачылу тантанасында ул алдагы шундый вакыйга өчен датаны 2024 елга тәкъдим итте.