Әтнәдә махсус хәрби операция зонасындагыларга матди ярдәм җыялар
Әтнәдә махсус хәрби операция зонасындагыларга матди ярдәм җыю дәвам итә. Ярдәм итү урыны үзгәрмәде, элекечә үк «РОСГОССТРАХ» бинасында кабул ителә. Олы Әтнә, Бәрәскә, Күлле-Киме, Күәм, Күшәр, Чишмәле - Сап, Төрекләр авылы кибетләрендә дә ярдәм җыю тартмалары урнаштырылган. Бу хакта «Әтнә таңы» хәбәр итә.
«Бу айда ярдәм сизелерлек кимеде, баштагы кебек энтузиазм бетте» - диде волонтер Чулпан Садыйкова.
Элекке юлы газ баллоннары, пила, май алып җибәргән булсалар, бу юлы генератор да сораганнар. Шулай ук «йокы капчыклар»ы да җибәрәләр. Моннан тыш, төрле ашамлыклар, гигиена кирәк-яраклары да китәчәк.
Район хакимияте дә консерва, сохари, кием-салым һ.б. әзерли. Болар барысы да 20 сентябрьдән соң махсус хәрби операция зонасындагыларга озатылачак.
«Махсус хәрби операция зонасына җибәрү өчен 10, 50, 100 сум да бик мөһим», – диелгән хәбәрдә.