Чувашиядә «Өч сәхабә» исемендәге мәчеттә татар мәкамы турында лекция булды
Чувашиянең Батыр районы Шыгырдан авылындагы «Өч сәхабә» исемендәге Үзәк Җәмигъ мәчетендә татар мәкамы турында лекция укыганнар. Чараны Чувашия Республикасы мөселманнары Диния нәзарәте оештырган.
Лектор буларак, дини җырлар башкаручы Марсель Вәгыйзов һәм «Рухи моң» иҗат берләшмәсе җитәкчесе Марсель Әхмәдуллин чыгыш ясаган. Бу хакта Россия мөселманнары Дини җыены Үзәкләштерелгән дини оешмасы матбугат хезмәте яза.
Чараның максаты — татар мәкамен популярлаштыру, азан уку сәнгате белән таныштыру. Шулай ук лекторлар матур сөйләм сәнгате һәм чыгыш ясаганда, дини текстларны укыганда дөрес сулау турында сөйләгән.
Лекциядә имам-хатыйблар һәм Чувашия Республикасы мәчетләре активлары катнашкан, диелә хәбәрдә.