Татарстанда җылыту сезонына әзерлек 99,9 процент тәшкил итә
Татарстанда җылыту сезонына әзерлекне Казандагы Лев Толстой урамында урнашкан бер генә котельня тәмамламаган. Бу хакта бүген Татарстан Хөкүмәте Йортында узган республика киңәшмәсендә төбәкнең төзелеш, архитектура һәм торак-коммуналь хуҗалык министры Марат Айзатуллин сөйләде.
Киңәшмәне Татарстан Рәисе Рөстәм Миңнеханов үткәрде. Анда шулай ук Татарстан Премьер-министры Алексей Песошин да катнашты. Бу хакта республика җитәкчесенең матбугат хезмәте хәбәр итә.
Тулаем алганда, Татарстан буенча котельняларның әзерлеге 99,9 процентка җитә. Әзерлек паспортлары 17823 күпфатирлы йортка алынган, бу аларның гомуми санының 99,9 процентын тәшкил итә, дип билгеләп үтте докладчы.
Моннан тыш, кышкы чорга сәламәтлек саклау, социаль яклау, мәгариф, мәдәният, яшьләр һәм спорт объектлары тулысынча әзерләнгән, дип ышандырды Айзатуллин.
Министр шулай ук җирле үзидарә органнарының, салкыннар килүен дә көтмичә, мөстәкыйль рәвештә, җылы җибәрә алуларын искәртте, беренче чиратта, «кешеләр даими була торган социаль объектларда». 22 муниципалитет шундый карар кабул итте.