Татарстанда үлгән акчарлакларның берсендә дә кош гриппы табылмаган
Татарстанда үлгән акчарлакларда кош гриппы ачыкланмаган. Быел башка төбәкләрдә, күбрәк бу кошлар вирус йоктырган, өстәвенә, алар күпләп үлгән. Бу хакта Федераль ветеринар һәм фитосанитар күзәтчелек хезмәтенең Татарстан буенча идарәсе җитәкчесе Илнур Галиев сөйләде.
«Татарстанга бу кагылмады. Без бу диагноз расланырлык бер акчарлак та тапмадык», – дип хәбәр итте спикер.
Май аенда Россиядә кыргый акчарлаклар популяциясендә кош гриппының 20дән артык очрагын ачыклаганнар. Чир Татарстанга керү куркынычы булу сәбәпле, Федераль ветеринар һәм фитосанитар күзәтчелек хезмәтенең идарәсе белгечләре үлгән акчарлакларны табу һәм тикшерү өчен җәй көне республика районнарына йөри башлады.
«Республика буйлап йөреп чыктык, аучылар да кушылды», – диде Галиев.
Бүгенге көндә Россиядә кош гриппының 73 очрагы ачыкланган.