Казан сәнәгатьтә 3D-технологияләргә багышланган Бөтенроссия форумын кабул итәчәк
20-21 ноябрьдә Казанда «Аддитив технологияләр — яңа чынбарлык» дип аталган V Бөтенроссия лидер-форумы узачак. ТР Премьер-министры Алексей Песошин чарага әзерлек һәм оештыру комитеты төзү турындагы боерыкны имзалады.
Документта билгеләп үтелгәнчә, вакыйга «аддитив технологияләр (3D-басма) тармагын үстерү һәм сәнәгатьнең төрле тармакларында яңа җитештерү технологияләре кертү» максатыннан үткәрелә.
Оештыру комитетын Татарстан Премьер-министры җитәкләячәк, ТР сәнәгать һәм сәүдә министры Олег Коробченко белән республика Рәисе ярдәмчесе Альберт Гыйльметдинов аның урынбасарлары булачак. Оештыру комитеты составына Казан югары уку йортлары ректорлары, республиканың фәнни учреждениеләре җитәкчеләре, министрлар, ведомство, бизнес вәкилләре һәм башка белгечләр кертелгән.
Искәртеп узабыз, июнь ахырында Татарстан Рәисе Рөстәм Миңнеханов Россиянең аддитив технологияләр өлкәсендәге әйдәп баручы белгечләре белән очрашты. Төрле детальләрне 3D-принтерларда бастыру авиатөзелеш, сәнәгать, архитектура һ.б. тармакларда кулланыла. Очрашуда республикада әлеге технологияләрне үстерү перспективалары хакында фикер алыштылар.