Казан тимер юлларында яшүсмернең ток сугудан үлеменнән соң җинаять эше кузгатылган
Казан тимер юлларында яшүсмер үлеме факты буенча тимер юл транспорты эксплуатациясе һәм хәрәкәт куркынычсызлыгы кагыйдәләрен бозу һәм саксызлык аркасында кешенең үлеменә китерүе турында җинаять эше кузгатылган. Бу хакта Россия Тикшерү комитетының транспортта төбәкара тикшерү үзәк идарәсе хәбәр итә.
Хәзерге вакытта фаҗиганең барлык шартларын ачыклауга юнәлдерелгән тикшерү чаралары алып барыла.
Элегрәк «Татар-информ» хәбәр иткәнчә, бүген көндез 14 яшьлек егет «Восстание-Дербышки» аралыгының 794нче километрында йөк поезды цистернасына менгән.
Нәтиҗәдә, малайга вагоннар өстеннән үтә торган контактлы үткәргечтән ток суга һәм ул алган җәрәхәтләреннән урында ук үлә.