Милли китапханәдә яңа татар мәдәнияте фестивале Jadidfest узачак
28-29 октябрьдә Милли китапханәдә яңа татар мәдәнияте фестивале Jadidfest узачак.
Әлеге фестивальнең беренче көнендә нәшриятләр һәм иллюстраторлар ярминкәсе, «Киләчәк үткән заман» күргәзмәсен ачык форматта җыю, Конференц-залда «Фатих Әмирхан» турында рус телендә лекция тыңлау булачак, дип хәбәр итә Бөтендөнья татар конгрессы матбугат хезмәте.
Төштән соң Фатих Амирхан турында комиксны тәкъдим итү көтелә. Кичке сәгать дүрттә «Фатих Әмирхан борчулары» инклюзив перформансы булачак. Аннан соң «Әмирхан Казаны» видео-гидын тәкъдим итәчәкләр. Кичке сәгать җидедә тәмамланмаган пьеса нигезендә «Спектакль алдыннан»ны карарга мөмкин булачак.
Икенче көнендә әлеге программага «Акрын укулар», «Фатих Әмирхан турында» татарча лекция, Стендап «Шалт, Мөхәммәтҗан!» проекты резидентларыннан Әмирханның сатирик әсәрләре нигезендә чыгышлар ясавы, Айдар Ниязов җитәкчелегендә милли оркестр беренче татар операсыннан өзекләр өстәлгән.