Фәрит Мөхәммәтшин дәүләт бүләкләре тапшырганда: Сездән үрнәк алырга кирәк
Татарстан Дәүләт Советы Рәисе Фәрит Мөхәммәтшин күренекле хезмәткәрләргә Россия һәм Татарстан дәүләт бүләкләрен тапшырды. Казан Кремлендә узган чарада төрле эшчәнлек тармагыннан барысы 51 вәкил бүләкләнде. Бу турыда «Татар-информ» хәбәр итте.
«Татарстанда икътисадның күп тармак алдынгылары белән даими очрашу традициясе барлыкка килде. Хезмәт коллективларында республиканы уңышлы үстерү юнәлешендә сезнең эшегез бик югары бәяләнә. Сез үз өлкәгездә уңышларга ирешкәнсез, сезгә тиңләшергә кирәк, сездән өйрәнергә һәм сездән үрнәк алырга кирәк», – диде парламент башлыгы.
Мөхәммәтшин ассызыклаганча, бүген Татарстан икътисады санкцияләр сынавын уңышлы узып үсә бара. «Сез моңа бик зур өлеш керткәнсез. Бездә андый кешеләр булу — дан», — дип белдерде ул.
Дәүләт Советы Рәисе авыл җирлегендә яшәүчеләрне аерым билгеләп үтте, алар «бүгенге кыенлыкларны җиңәр өчен зур көч куя». «Һәм бу шартларда республика бөтен Россиягә үрнәк күрсәтә. Авылда һәр халыкның гореф-гадәте һәм йолалары яхшырак саклана, шуңа күрә аны тагын да ныгытырга кирәк. Бу кыйммәтләрне сакларга һәм якларга кирәк», — диде ул.
Үзенең чыгышы ахырында парламент башлыгы тантанада катнашучыларга Татарстан файдасына куйган хезмәтләре өчен рәхмәт белдерде. «Сезгә карап башкалар тиңләшә, сез үз һөнәреңә ничек намуслы карарга кирәклеген күрсәтәсез. Шуңа күрә сезгә лаеклы бүләкләр тапшырабыз», – дип йомгаклады ул.
Аннары Фәрит Мөхәммәтшин дәүләт бүләкләрен тапшырды. Мәсәлән, II дәрәҗә «Ватан алдындагы казанышлары өчен» орден медале белән Казан төгәл машиналар төзү заводының шомартучысы Рамил Баһавиев, Казан дары заводында махсус эшләнмәләрне җыючы Ольга Гончарова һәм әлеге предприятиенең әйдәп баручы инженеры Ольга Ерофеева, «Полиметаллинвест-НК» ҖЧҖ директоры Валерий Иванов бүләкләнде.
«Россиянең атказанган табибы» дигән мактаулы исем Республика клиник хастаханәсе бүлек җитәкчесе Әлфия Одинцовага һәм Казан федераль университетының Фундаменталь медицина һәм биология институты Югары медицина мәктәбе Медицина һәм фармация үзәге кафедра мөдире Рәис Хафизовка бирелде.
Ирешкән хезмәт уңышлары һәм күпьеллык нәтиҗәле хезмәте өчен перинаталь үзәкле Әлмәт шәһәр балалар хастаханәсенең бүлек җитәкчесе Кирилл Булатов һәм Республика клиник хастаханәсе бүлек җитәкчесе Рафаэль Нигъмәтҗановка һ. б. Россия Президентының Рәхмәте игълан ителде.
«Дуслык» орденын Казан федераль университетының Филология һәм мәдәниятара коммуникацияләр институты әйдәп баручы фәнни хезмәткәре Марсель Бакиров алды.
«Фидакарь хезмәт өчен» медаленә Дәүләт Гамәли оптика институтының метрология бүлеге башлыгы Виктор Курт, «Чаян» журналы мөхәррире Алмаз Хәмзин, Татарстан Мәгариф һәм фән министрлыгының кадрлар сәясәте бүлеге башлыгы Лилия Әмирова һ. б. лаек булды.