ЦУМ бинасында Халык һөнәрчелеге үзәге ачу буенча эш бара
ЦУМ бинасында Халык һөнәрчелеге үзәге ачу буенча проектлау эшләре бара. Аның концепциясе килештерелә, контент турында уйланыла.
«Хәзерге вакытта проект эшләре бара. Ел азагына концепциясе күзалланыр дип уйлыйм», диде мәдәният министры урынбасары Дамир Натфуллин «Татар-информ»да узган матбугат конференциясендә.
«Объект үзе дә, урнашкан урыны да бик җитди. Без аңа зур өметләр баглыйбыз. Алда Үзәк универсаль магазинның элеккеге данын кайтару максаты тора. Шәһәр халкы һәм кунаклары бу магазинга йөрү традицияләрен яңартсын иде», диде ул.
Дамир Натфуллин бинаны яңача ачу өчен эксперт сессияләре уздырылуын искәртте. Бинаның концепциясе һәм идеологиясе белән ялгышырга ярамавына басым ясады.