Актаныш районында махсус операциядә катнашучыларга ярдәм йөзеннән хәйрия концерты булды
Татарстанның Актаныш районы Иске Богады авылында «Без бергә» хәйрия концерты булды. Быелның соңгы концертына махсус хәрби операциядә катнашучы солдатларның әти-әниләре, хатыннары, шулай ук якын туганнары һәм дуслары чакырылган иде.
Районның волонтерлар корпусы җитәкчесе Гөлинә Иделбаева чарада катнашучыларга теләктәшлек һәм рәхмәт сүзләре белән мөрәҗәгать итте. «Авыл җирлеге башлыгына һәм мәдәният хезмәткәрләренә бик зур рәхмәт», - диде ул.
Кичәдә катнашучылар хәрбиләргә ярдәм күрсәтергә чакырды. Чыгыш ясаучылар билгеләп үткәнчә, хәзерге вакытта фронтта хәрби бурычын үтәүче якташларга шуны белү мөһим: өйдә барысы да әйбәт, аларны яраталар һәм көтәләр. Аларга ышанычлы тыл һәм ярдәм кирәк.
Концертта барлыгы 17,2 мең сум акча җыелды.
Махсус хәрби операция РФ Президенты Владимир Путин карары белән 2022 елның 24 февраленнән бирле үткәрелә. РФ Хөкүмәтендә күп тапкырлар белдерүләренчә, махсус операция тиешле максатларга (шул исәптән Россиянең иминлеген тәэмин итә торган шартлар тудыру) ирешкәнче дәвам итәчәк.
- Россия Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны аша күбрәк белергә мөмкин.