Миңнеханов ташламалы ипотека программаларын срогы чикләнмәгән итәргә тәкъдим итте

Татарстан Рәисе Рөстәм Миңнеханов ипотеканың ташламалы программаларын срогы чикләнмәгән итәргә һәм кредитның чик күләмен арттырырга тәкъдим итте. Ул «Төзелеш, торак-коммуналь хуҗалыгы, шәһәр мохите» юнәлеше буенча Россия Дәүләт Советы Комиссиясенең (аның рәисе булып тора) һәм Россия Дәүләт Думасының төзелеш һәм торак-коммуналь хуҗалыгы комитетының гомуми утырышында чыгыш ясады. Бу хакта республика җитәкчесе матбугат хезмәте хәбәр итә.

Рөстәм Миңнеханов сүзләренчә, ташламалы ипотека программаларының гамәлдә булу вакытының һәр тәмамлануы торакка зур ихтыяҗ тудыра. Шуңа бәйле рәвештә ул аларны авыл ипотекасына охшаш итеп, лимитлар булганда, мөддәте чикләнмәгән итәргә тәкъдим итә.

«Ташламалы ипотека программалары халыкта торак сатып алуга тотрыклы ихтыяҗ формалаштырырга мөмкинлек бирде. Гомумән алганда, 2023 елның ун аенда ипотека кредитлары саны узган елгы дәрәҗәгә карата 61 процентка артканын күрәбез», — дип белдерде Татарстан Рәисе.

Шул ук вакытта ул «бер сорауга» игътибарны юнәлтте. «Төп ставка ике тапкыр артты, һәм бу ипотека ставкаларының артуына һәм сату темпларының кимүенә китерәчәк. Сентябрь белән чагыштырганда, бу инде октябрь нәтиҗәләре буенча ук күренә», —дип аңлатты Миңнеханов.

Аның бәяләве буенча, беренчел торак базары ташламалы ипотека программалары хисабына эшләячәк. Ул Казанда ике бүлмәле фатирның уртача бәясен 12-13 млн сум дип атады, бу «балалы гаиләләр өчен иң күп соралган вариант» дип төгәллек кертте.

Бу контекстта Татарстан Рәисе шулай ук гаилә һәм ташламалы ипотека буенча кредитның чик күләмен хәзерге 6 млн сумнан 12 млн сумга кадәр арттырырга киңәш итте. Моннан тыш, ул Россия вице-премьеры Марат Хөснуллинның гаилә ипотекасы (6 процент), ташламалы (8 процент) һәм авыл ипотекасы (3 процент) буенча хәзерге процент ставкаларын саклап калу тәкъдимен хуплады.

«Губернаторларның эшчәнлеген бәяләүнең төп критерийларның берсе — халыкның торак шартларын яхшырту. Ипотека кешеләргә барып җитми икән, без торак шартларын ничек яхшыртачакбыз?» — дип риторик сорау бирде ул.

Шул ук вакытта Рөстәм Миңнеханов ассызыклаганча, Россия Президенты Владимир Путин һәм Россия Хөкүмәте вакытында кабул иткән ярдәм чаралары ярдәмендә төзелеш тармагы яхшы темп алды һәм уңай динамика күрсәтә. Әйтик, Татарстанда бу елны торакны файдалануга тапшыру буенча рекордлы күрсәткеч — 3 млн кв.метрдан артык нәтиҗә белән тәмамлау күздә тотыла.

Элегрәк билгеле булганча, Хөкүмәт гаилә һәм ташламалы ипотека өчен беренчел взносны арттырырга планлаштыра. Моңа кадәр Дәүләт Думасында яңа төзелешләргә ташламалы ипотека бирүне кырысландырырга тәкъдим иттеләр.