Татарстанлылар Яңа ел каникулыннан соң ук диспансеризация уза алачак

Татарстан Республикасы медицина учреждениеләре диспансеризация узарга теләүче гражданнарны кабул итүне яңа ел каникулларыннан соң башлаячак. Бу хакта Татарстан сәламәтлек саклау министры урынбасары һәм Казан шәһәре сәламәтлек саклау идарәсе башлыгы Владимир Жаворонков хәбәр итте.

Ул планлы диспансерлаштыруның ике этапны үз эченә алуын искәртте. Беренче этапта граждан база дәрәҗәсендә төп тикшерү үтә һәм анализлар тапшыра. Патологияләр ачыкланган очракта аңа өстәмә, зуррак тикшеренүгә юллама бирелә.

«Ул үз эченә УЗИ, гастроскопия, колоноскопия һәм башка тикшеренүләрне ала», – дип аңлатты Владимир Жаворонков.

Ул шулай ук һәр яшь төркеменең үз үзенчәлекләре барлыгын билгеләп үтте. Мәсәлән, 45 яшьтән өлкәнрәк кешеләргә ашказаны-эчәк трактында онкологик авыруларны профилактикалау өчен гастроскопия үткәрелә.

Сәламәтлек саклау министры урынбасары ассызыклаганча, бүген диспансерлаштыруга кызыксыну берничә ел элек булганнан күпкә югары. Ул татарстанлыларны планлы тикшерүләрне озакка сузмаска чакырды.

Владимир Жаворонков шулай ук яңа ел каникуллары чорында медицина учреждениеләренең эш режимы турында мәгълүмат бирде.

Ашыгыч һәм кичектергесез ярдәм гадәттәге график нигезендә күрсәтелә — стационарларның кабул итү бүлекләре һәм травматология пунктлары тәүлек әйләнәсе эшләячәк.

Имгәнгән бала белән балалар медицина учреждениеләренә мөрәҗәгать итү мәҗбүри түгел — аларны теләсә кайсы травмпунктта кабул итәчәкләр.

Амбулатор бүлекләр дә ял көннәрендә гражданнарны кабул итү өчен ачык булачак. Конкрет даталар турында тулырак мәгълүмат Казан шәһәре сәламәтлек саклау идарәсенең социаль челтәрләрендә биреләчәк.