Үзәк сайлау комиссиясе: Муниципаль депутатларны өстәмә сайлауда кагыйдә бозу теркәлмәде
Мәскәү вакыты белән 20.00 сәгатькә Татарстанда бөтен сайлау участоклары ябылды һәм республикада муниципаль депутатларны өстәмә сайлау тәмамланды. Бу турыда Татарстан Үзәк сайлау комиссиясенең телеграм-каналында хәбәр ителә.
«Көн дәвамында 10 декабрьдә Үзәк сайлау комиссиясенең кайнар элемтәсенә Татарстанда яшәүчеләрдән 67 мөрәҗәгать килде. Алар барысы да мәгълүмат-белешмә характерында иде, дәгъвалар булмады. Сайлау нәтиҗәләренә йогынты ясый торган кагыйдә бозулар теркәлмәде. Сайлау участоклары ябылгач, комиссия әгъзалары тавышларны хисаплауга кереште», диелә хәбәрдә.
Шәһәр һәм авыл советларына депутатларны өстәмә сайлау республиканың 15 муниципаль районында булды. Сайлау барышын бәйсез күзәтүне 200ләп кеше тәэмин итте. Бу – сәяси партияләрнең төбәк бүлекчәләре, депутатлыкка кандидатлар, Татарстан Иҗтимагый палатасы вәкилләре.
Шулай ук Татарстан Үзәк сайлау комиссиясенең сайлау участокларында эшләү өчен 18 төбәк матбугат чараларыннан 50дән артык журналист аккредитацияләнгән иде, диелә хәбәрдә.
- Бүген 18.00 сәгатькә Татарстанда шәһәр һәм авыл советларына депутатларны өстәмә сайлауга килүчеләр саны 59,9 процент булды, дип язган идек.