Рөстәм Миңнеханов югары уку йортлары һәм фәнни оешмалар җитәкчеләре белән очрашты
Татарстан Республикасы Рәисе Рөстәм Миңнеханов республикада урнашкан югары уку йортлары ректорлары һәм фәнни учреждениеләр җитәкчеләре белән очрашты. Очрашуда 2023 елда уртак эшкә йомгак ясадылар һәм киләсе елга планнар билгеләделәр. Чара КФУда узды. Бу турыда Татарстан Рәисе матбугат хезмәте хәбәр итте.
Рөстәм Миңнеханов билгеләп үткәнчә, Яңа ел алдыннан мондый очрашуларны үткәрү яхшы традициягә әверелде. «Бүген югары белем бирү системасында зур үзгәрешләр бара. Барысы да белемнең конкуренциягә бирешмәүнең һәм үз-үзеңне тәэмин итүнең бердәнбер юлы икәнен аңлады. Башка юлы юк. Быел безнең югары уку йортлары зур эш башкарды. Узып баручы елның мөһим казанышы – тагын 2 югары уку йорты базасында алдынгы инженерлык мәктәпләре булдырылачак. Бу АГНИ һәм КНИТУ-КАИ. Тулаем алганда, Татарстанның югары уку йортлары зур потенциалга ия, бергәләп алга барырга кирәк», - дип ассызыклады республика Рәисе.
Республика югары уку йортлары ректорлары советы рәисе, КФУ ректоры Ленар Сафин билгеләп үткәнчә, югары уку йортларын үстерү өчен төп проект - «Приоритет 2030». КФУның махсус комиссиясе карары буенча беренче төркемдә үз урынын саклап калачак һәм 2024 елда өстенлекле программаларны үстерүгә 715 млн сум акча алачак. Шулай ук грантның махсус өлешен алучы югары уку йортлары санына КХТИ (463 млн сум) керде. КДМУ грантның база өлешен (100 млн сум) алу өчен комиссия тарафыннан сайлап алынган.
Югары уку йортлары инфраструктураны үстерү буенча зур эш башкарган. Апрель ахырында КФУның Җизактагы филиалында симуляцион медицина үзәге ачылган, сентябрьдә КФУда күп функцияле стоматология поликлиникасы эшли башлаган.
Чит шәһәр студентлары өчен шартлар яхшыртылган. Мәсәлән, КАИ укучылары өчен 620 урынга исәпләнгән тулай торак ачылган. Капиталь ремонт Казанда һәм Чаллыда КФУның 3 тулай торагында үткәрелгән - барлыгы 1 мең 150 урын яңартылган. Казан медицина университетының 640 урынга исәпләнгән тулай торагына капиталь ремонт ясалган. Казан аграр университеты 620 урынга исәпләнгән заманча тулай торак төзи башлаган.
Шушы көннәрдә Әлмәт нефть институтында дөньякүләм дәрәҗәдәге уку-лаборатория корпусы, шулай ук укытучылар өчен торак йортлар тапшырылган. КХТИның Түбән Кама филиалы базасында төп корпусны капиталь ремонтлау тәмамлана, анда «СИБУР» ҖЧҖ - СИБУРИНТЕХ уку үзәге булдырыла. Моннан тыш, КХТИ, «Аммоний» АҖ һәм Менделеевск районы белән берлектә, Менделеевск шәһәрендә химия-технология колледжы кампусын проектлауга керешкән.
Шулай ук очрашу кысаларында төбәк фәнни-технологик үсешнең төп проблемалары һәм аларны хәл итү турында Татарстан Фәннәр академиясе президенты Рифкать Миңнеханов сөйләде. РФА Казан фәнни үзәген алга таба үстерүнең өстенлекле юнәлешләре белән учреждение директоры Алексей Калачев таныштырды, диелә хәбәрдә.