Эльмира Зарипова Азнакайның Актүбә бистәсендә картлар һәм инвалидлар йортында булды
Бүген Татарстан хезмәт, халыкны эш белән тәэмин итү һәм социаль яклау министры Эльмира Зарипова Азнакай районына эш сәфәре кысаларында Актүбә бистәсенең картлар һәм инвалидлар йортында булды. Бу хакта «Азнакай» сайтында хәбәр ителә.
Район башлыгы Марсель Шәйдуллин озатуында Эльмира Зарипова биредә тәрбияләнүчеләр белән аралашты, алар өчен булдырылган шартлар белән танышты, яңа бүлмәләрне карады.
Җитәкчеләр шушында яшәүчеләр һәм бистә үзешчәннәре көче белән әзерләнгән бәйрәм концертын карады, өлкәннәрне якынлашып килүче Яңа ел бәйрәме белән котлады.
- Биредә бик көчле, бердәм коллектив эшли. Киләчәктә дә исән-сау булып, иминлектә, сәламәтлектә яшәргә язсын барыгызга да, - диде Эльмира Зарипова. - Без шулай ук һәрдаим ярдәмнәре өчен шәхсән район башлыгы Марсель Шәйдуллинга, «Татнефть» коллективына да рәхмәтлебез.
Җитәкчеләр биредә яшәүчеләргә кышкы спорт киемнәре дә бүләк иттеләр.