Рөстәм Миңнеханов, Иделдә суднолар йөрешен арттырырга кирәк, дигән фикердә
Татарстан Рәисе Рөстәм Миңнеханов Иделнең саегуына карата фикерен әйтте. «Елганы коткару комплекслы төстә башкарылырга тиеш. Суднолар йөреше күләмнәрен дә арттырырга кирәк», - диде ул журналистларга йомгаклау матбугат конференциясендә.
«Идел ул - электр станцияләре, сусаклагычлар каскады. Кәтлитләр һәм чебеннәр аерым булырга тиеш. Кайсыдыр якка авышса, каядыр нәрсәдер җитмәячәк. Идел ул, беренче чиратта, судночылык, эчәргә яраклы су белән тәэмин итү өчен каралган. Су дәрәҗәсе өчен җавап бирүче хезмәтләр бер бурычны гына хәл итәргә тиеш түгел, бу комплекслы бурыч. Аны хәл итеп була дип ышанам. Дәүләт башлыгы шундый йөкләмә бирде», - диде Рөстәм Миңнеханов.
- Бу хакта сорау туры элемтә барышында РФ Президенты Владимир Путинга да бирелгән иде.
«Бу сораулар комплекслы каралсын өчен сигналдыр бу, бер мәсьәләне хәл иттек тә, булдырдык түгел. Тулаем алганда, күпме миллион кеше интегә, быел бигрәк оят бу», - диде республика Рәисе.
«Суднолар йөрешен арттырырга кирәк, чөнки бу иң арзан транспорт төре. Идел Каспийга коюын, ә Каспий көньяк диңгезләргә таба баруны исәпкә алганда, Иранга кадәр барып җитә алабыз. Без суднолар йөрешенә иътибар бирергә тиеш», - дип белдерде Рөстәм Миңнеханов.