АҚШ Маск компаниясига мия имплантларини одамларда синовдан ўтказишга рухсат беришдан бош тортди
АҚШ регулятори Илон Маск компаниясига мия имплантларини одамларда синовдан ўтказишга рухсат беришдан бош тортди, деб ёзди Reuters.
Neuralink компанияси 2022 йил бошида Озиқ-овқат ва дорилар сифати устидан санитар назорат бошқармасига (FDA) ариза топширган эди. Бироқ у рад этилди.
Neuralink мия чипларини одамларда синаб кўришни режалаштираётгани ҳақида Маск 2019 йилдан бери бир неча бор хабар берган. Тадбиркорнинг сўзларига кўра, компания томонидан ишлаб чиқилган имплантлар фалаж ва кўрлик каби касалликларни даволашда ёрдам бериши мумкин. Neuralink вакиллари фалаж бўлган беморларга компютер матни орқали уни ёзмасдан мулоқот қилиш имконини берувчи механизм яратишни ўз мақсадларидан бири деб эълон қилган эди. Бироқ, FDA хавфларни жуда катта деб ҳисоблади.
Рад этишни асослаш учун регулятор Neuralink инсондаги синовларга ўтишдан олдин ҳал қилиши керак бўлган ўнлаб муаммоларни санаб ўтган. Энг катта ташвиш қурилмадаги литий батареяси билан боғлиқ эди. FDA имплантнинг мия тўқималарига зарар бермаслиги бўйича шубҳаланган.
Қайд этилишича, FDA рад этганидан бир йил ўтгач, компания ҳали ҳам муаммоларни ҳал қилмаган. Шунга қарамай, Маск Neuralink 2023 йилнинг баҳорида регулятордан рухсат олишига ваъда бермоқда.
Neuralink 2016 йилда ташкил этилган. Унинг тахминий қиймати 1 миллиард доллардан ошади. 2021 йил апрел ойида компания миясига чип ўрнатилган маймунни кўрсатди. Ҳайвон компютер мониторидаги курсорни фикр кучи билан бошқарди ва стол тенниси ўйнади.
2022 йилда АҚШ ҳукумати Neuralink компаниясининг ҳайвонлар синови билан шуғулланиши юзасидан тергов бошлади. Унинг натижалари ҳақида ҳали ҳеч нарса маълум эмас. Компания ходимлари ҳайвонларда синовларнинг ўтказилиши уларнинг азобланиши ва ўлимига олиб келишини айтган эди.
Neuralink компаниясининг энг муваффақиятли рақобатчиси Synchron бўлиб, у аллақачон фалаж бўлган беморларга ёрдам бериш учун мўлжалланган BCI имплантини одамларда синаб кўриш учун рухсат олган ва бир нечта операцияларни амалга оширган.