Ўзбекистонда тўланган кешбэклар 890 млрд сўмдан ошди
Солиқ мобил иловаси орқали 2 099 554 нафар фойдаланувчига жами 890,1 млрд сўм кешбэк тасдиқлаб берилди. Бу ҳақда Солиқ қўмитаси ахборот хизмати хабар берди.
Хабарга кўра, кешбэкларни тўплаш ва уни олишда фирибгарлик ҳолатлари ёки шубҳали харидорлар кўп учрамоқда. 20 мингдан ортиқ фойдаланувчи шубҳали харидорлар рўйхатига тушган.
Face ID’дан ўтиш талаби босқичма-босқич киритилди. Бунинг учун кўп нарса талаб этилмайди, фақат 2 та амал бажарилади (аксарият 30 секундгача вақт олди):
жисмоний шахснинг шахсий идентификация рақамини (ЖШШИР) киритиш;
юзни тўлиқ суратга олиб тасдиқлашга юбориш.
Қайд этилишича, мурожаатлар 24/7 режимда 1198 Call-марказ орқали қабул қилинади. Истеъмолчилар ва ҳақиқий фойдаланувчиларнинг кешбэк олиши кафолатланади.
Маълумот учун, январь ойида чеклари энг кўп рўйхатдан ўтказилган компаниялар орасида Korzinka етакчилик қилмоқда — 2,6 миллион дона чек. Korzinka’дан сотиб олинган маҳсулотларга 3,7 млрд сўм кешбэк берилган.
Иккинчи ўринда Havas чеклари (1,3 миллион дона, кешбэк суммаси 703,1 млн сўм) қайд этилган бўлса, UNG Petro чеклари (594,5 минг та чек, кешбэк суммаси 2,7 млрд сўм) учинчи бўлган.