Жанубий Калифорния тоғларида қор бўрони 13 кишининг ҳаётига зомин бўлди
Жанубий Калифорниянинг Сан-Бернардино округида юз берган қор бўрони оқибатида 13 киши ҳалок бўлди, дея хабар бермоқда ABC News агентлиги.
Сан-Бернардино округи шериф идораси ҳар бир воқеани алоҳида текширди. Ушбу ўлимлардан фақат биттасига ёмон об-ҳаво туфайли содир бўлган йўл-транспорт ҳодисаси сабаб эканлиги аниқланди.
Маълумот ўрнида, 23 февраль куни Миллий об-ҳаво хизмати Сан-Бернардино тоғларида сўнгги 30 йил давомида қайд этилмаган қор бўрони бўлишидан огоҳлантирган эди. Синоптиклар 150 см қор ёғишини башорат қилишган.
Қор бўрони туфайли Калифорнияда февраль охиридан март ойининг бошигача мисли кўрилмаган қор ёғди. 27 февраль куни Сан-Бернардино округида фавқулодда ҳолат эълон қилинганди, чунки тоғ аҳолиси ўз уйларида қолиб кетган ёки кучли қор туфайли уйга кира олмай қолган.
Ҳатто Сан-Бернардино аҳолиси қор билан қопланган уйларини тарк эта олмай, 14 кун давомида озиқ-овқатсиз қолган.