Энергия ресурсларидан ноқонуний фойдаланиш ҳолатлари ҳақида хабар бериш учун махсус Telegram бот ишлаб чиқилди
Ботга йўлланган ҳар қандай маълумот прокуратура органларида ташкил қилинган Ишчи гуруҳга автоматик тарзда келиб тушади.
Бош прокуратура томонидан энергия ресурсларини талон-торож қилинишини олдини олишда жамоатчилик назоратини йўлга қўйиш мақсадида махсус телеграм-бот (@EnergonazoratBot) дастури ишлаб чиқилди.
Бош прокуратура хабарига кўра, фуқаролар ўзлари яшаётган ҳудудда энергетика соҳасидаги қонунбузарликлар ҳақида бот орқали хабар йўллашлари мумкин.
Фуқаролар энергетика соҳасидаги ҳар қандай қонунбузилиши ҳолатларини бартараф этиш, ноқонуний фойдаланилаётганини ўз вақтида аниқлашда фаол ҳамкорликка чақирилган.
Махсус Telegram ботга келиб тушган ҳар қандай маълумот прокуратура органларида ташкил қилинган Ишчи гуруҳга автоматик тарзда келиб тушади. Ишчи гуруҳ томонидан ҳар бир қонунбузилиш ҳолати ҳақидаги маълумот синчиклаб ўрганиб чиқилиб, натижаси бўйича қонуний чоралар кўрилади.