Қашқадарёда аёлни қамчилаб, унинг сочини олиб ташлаган ота ва уч ўғил жавобгарликка тортилди

Қашқадарё вилоятининг Яккабоғ туманида 38 ёшли аёлнинг бир нечта эркак томонидан калтакланиб, сочи кесиб ташлангани ҳақида хабар берилганди. “Замон” информацион дастурида маълум қилинишича, жиноят ишлари бўйича Деҳқонобод туман судида ушбу эркакларга нисбатан жиноят иши кўриб чиқилган.

Воқеа 2022 йил 9 июль куни, кечаси соат 23:00 атрофида содир бўлган. Аёл 10 ёш кичик йигит билан ишқий муносабатда бўлиб юрган. Бу эса ўғлини уйлантирмоқчи бўлган хонадон эгаси ва йигитнинг қариндошларига маъқул келмаган. Шу боис аёл ўша йигит хонадонига олиб борилиб, йигитнинг ака-укалари томонидан калтакланган.

Суд ҳужжатларига кўра, бошқа бир қизга унаштирилган йигит ўзидан катта аёлга илакишиб, унинг уйида яшаётганидан хабар топган акалар шу куни аёл ва укасини уйларига олиб келган.

Шундан сўнг иккисини арқон билан боғлаб, ўғилнинг кўз ўнгида аёл қамчи билан калтакланган, ўғилларининг ҳаракатини назорат қилиб турган ота аёлнинг сочини олишни буюрган. Уйдаги аёллардан бирининг раҳми келиб, жабрланувчининг арқонини ечиб юборган ва у деразадан кўчага қочиб чиққан.

Суд давомида жабрланувчи айбланувчиларни кечирганини билдирган. Суд ҳукмига кўра, ота ва кенжа ўғилга уч йил муддатга озодликдан чеклаш жазоси, қолган икки ўғилга эса уч ва икки йилга озодликдан маҳрум этиш жазоси тайинланди.