АҚШ Алишер Усмоновнинг USM холдинги дохил Россиядаги қатор ширкатлар ва амалдорларга қарши санкция жорий қилди
Қўшма Штатлар Россиянинг бош вазири ўринбосари Марат Хуснуллин, “Мегафон” ва “Металлоинвест” ширкатлари ҳамда “Юнармия” ҳаракатига қарши санкциялар киритди, дея хабар қилди Озодликнинг рус хизмати. Санкция рўйхати АҚШ Молия вазирлиги сайтида чоп этилган.
Юқорида зикр этилганлардан ташқари собиқ транспорт вазири Евгений Дитрих, Давлат думаси депутати Андрей Скочнинг қизи ва отаси, Россия бадиий гимнастика федерацияси президенти Ирина Винернинг ўғли, Халқаро инвестиция банки ва унинг раҳбари Николай Косов, асли ўзбекистонлик миллиардер Алишер Усмоновнинг USM холдингига қарши ҳам санкциялар жорий этилган.
Бу орада алоҳида лицензия билан “Коммерсант” нашри санкция рўйхатидан чиқарилган.
Буюк Британия ҳам 12 апрель куни Россияга қарши санкциялар рўйхатини кенгайтирган. Рўйхатга USM холдинги, “Система” акциядорлик молия корпорацияси асосчиси Владимир Евтушенковнинг уч фарзанди ҳамда Федерация Кенгаши аъзоси, тадбиркор Сулейман Каримовнинг қизи киритилган.