Шакира “Йил аёли” дея эътироф этилди
Ўтган ёзда колумбиялик қўшиқчи Шакира ўзининг узоқ йиллик турмуш ўртоғи, икки фарзандининг отаси, испаниялик футболчи Жерар Пике билан ажрашган эди.
Шакира ўзининг ҳис туйғуларини оммадан яширмади. Хонанда Пике ва унинг янги севимли машғулотларига, шунингдек, ўз тажрибаларига бағишланган бир нечта трекларни чиқарди. Ҳиссий портлаш яна бир бор Шакирани шон-шуҳрат чўққисига кўтарди.
Маълум бўлишича, қўшиқчи нуфузли Billboard нашри томонидан “Йил аёли” деб эътироф этилган, шунингдек, ушбу унвонга сазовор бўлган биринчи Лотин Америкаси аёлига айланди.
“Шакира – мусиқадаги мукаммал аёл. У Лотин Америкаси аёлларига бутун дунё бўйлаб шахсий мусиқа ёзиш ва ижро этиш имкониятини берди”, – дейди Billboard контенти директори Лейла Кобо.
Эслатиб ўтамиз, 46 ёшли колумбиялик қўшиқчи Шакира ва 36 ёшли испаниялик футболчи Жерар Пике 11 йиллик муносабатлардан сўнг 2022 йилнинг июнь ойида ажралишди.