Япониядан ракета парчалари топилди. У Хитойга тегишли бўлиши мумкин

Катта эҳтимоллик билан Хитой космик ракетасига тегишли бўлган парча Япониянинг Кагосима префектурасидаги Окиноэрабу ороли қирғоғидан топилди. Бу ҳақда РИА Новости NHK телеканалига таяниб хабар берди.

ОАВ маълумотларига кўра, топилма ҳақидаги хабар 20 апрель куни маҳаллий аҳолидан келган, бироқ бу ҳақда энди маълум қилинди.

Парчанинг ўлчам узунлиги тахминан уч метр ва кенглиги икки метрга тенг. Сирти оқ рангга бўялган ва қизил фонда сариқ юлдузлар нақшлари билан безатилган. Бундан ташқари, фрагментда хитойча иероглифда ёзилган «вентиляция тешиги» иборасини кўриш мумкин.

Телеканалга интервью берган мутахассисларнинг сўзларига кўра, қирғоққа келиб қолган парча ракетанинг тепа қисмида жойлашган қалпоқнинг бир қисмидир.

Хитой космик фан ва технология корпорацияси 16 апрель куни маҳаллий вақт билан 09:36 да Хитой шимоли-ғарбидаги Ганьсу провинциясидаги Цзюцюань космодромидан “Чанчжэн-4B» ракета ташувчиси ёрдамида Fengyun-3 метеорологик сунъий йўлдошини муваффақиятли учиргани ҳақида маълум қилганди.

Ўз навбатида, Хитойнинг денгиз хавфсизлиги маъмурияти шу куни эрталаб Тайвань ороли шимолида Шарқий Хитой денгизига ракета парчалари тушиши мумкинлиги ҳақида хабар тарқатган.

Қайд этилишича, 16 апрель куни соат 09.00 дан 15.00 гача ушбу ҳудудга кириш тақиқланган.
Окиноэрабу ороли Тинч океанидаги Нансэй архипелагининг Амами ороллари таркибига киради. Оролдан ТайваньТайбэй пойтахтигача бўлган масофа тахминан 500 километрни ташкил қилади.