Вазир ўринбосари Янгийўл ҳокими вазифасини бажарувчига айланди
Жорий йилнинг февралидан Ўзбекистон Иқтисодиёт ва молия вазири ўринбосари лавозимида ишлаб келган Дилшод Султонов 7 август куни Тошкент вилояти Янгийўл шаҳри ҳокими вазифасини бажарувчи этиб тайинланди.
Расман билдиришича, вилоят ҳокими Зойир Мирзаев иштирокида ўтган шаҳар кенгашининг навбатдан ташқари сессиясида Султонов номзоди президент Шавкат Мирзиёев томонидан тавсия этилгани айтилган.
Янгийўлнинг аввалги ҳокими Фарҳод Мирзаев 2023 йил июлида президент раислигида ўтган видоселекторда ўндан ортиқ туман ва шаҳар ҳокимлари қаторида ишдан олинганди. Аммо шаҳар кенгашида нутқ сўзлаган вилоят ҳокими Зойир Мирзаев Фарҳод Мирзаевнинг “соғлиғига қарамай ёмон ишламагани”ни таъкидлаган.
1980 йилда туғилган Дилшод Султонов 2002 йилда Тошкент темир йўл муҳандислари институтини иқтисодчи мутахассислиги бўйича тамомлаган. 2003 йилдан Молия вазирлигида ишлаб келган.