Абитуриентлар ўқишга кирган ёки кирмаганини ҳозирдан била олишадими?

Аввал хабар берганимиздек, 13 августда бўлган тест натижалари ҳам эълон қилинибди. Демак, бу дегани — 1 августдан 13 августга қадар бўлиб ўтган барча тест синовларининг натижалари маълум бўлди. Бу хақда Хушнуд Худойбердиев ёзяпти.

«Хўш, бу нимани англатади? Демак, энди https://mandat.uzbmb.uz сайтидаги рўйхат бошқа ўзгармайди.

Қиссадан ҳисса, ҳозир асосий квота бўйича ўқишга кирганлар рўйхатида турганлар, якуний натижаларни кутиб ўтирмасдан, талабаликни аллақачон нишонлайверса бўлади.

Чунки ҳозир абитуриентлар бештагача танлаган йўналишлари бўйича барча рўйхатда туришибди (яъни 1 киши 5 та рўйхатда турибди), мандатда эса фақат 1 та рўйхатда қолади ва тўрттасидан ўчирилади. Бу дегани ҳозирги рўйхатдан кимдир чиқиб кетса кетадики, лекин бошқа йўналишдан баланд балл олган бегоналар рўйхатга келиб қўшилмайди.

Бундан ташқари ҳарбий тавсиянома олганлар, ногиронлиги борлар, тавсияномали хотин-қизлар, ҳарбийларнинг фарзандлари ва бошқа имтиёзга эгалар қўшимча квота бўйича умумий рўйхатдан чиқиб кетади.

Хуллас, мандат чиққанда ҳозирги рўйхатдаги ўрнингиздан тепароққа кўтарилиш эҳтимолингиз жуда юқори, лекин пастга тушмаслигингиз аниқ.

Демак, ҳозир рўйхат бўйича ажратилган квота ичида турганлар албатта талаба бўлади. Шунингдек, ҳозир контрактни бошида турганлар буджетга кўтарилиши ҳам мумкин.

Кира олмаганларчи? Улар умид қилса бўладими?

Ҳа, бўлади. Лекин улар ҳозирдан аниқ била олмайди», деб ёзади у.