Тошкентдан 700 км узоқликда Қозоғистондаги биринчи АЭС қурилиши мумкин
Қозоғистонда биринчи атом электр станцияси (АЭС) Олмаота вилоятининг Жамбил туманидаги Улкен қишлоғи ҳудудида қурилади.
Қозоғистон Энергетика вазирлигининг эслатишича, мамлакат қонунчилигига кўра, атом иншоотлари қурилиши участкаси тўғрисидаги қарор маҳаллий вакиллик органларининг розилиги билан мамлакат ҳукумати томонидан қабул қилинади. Улкен қишлоғида АЭС қурилиши тўғрисидаги қарор Олмаота вилояти маслаҳат кенгаши томонидан 2022 йил ноябрь ойида бир шарт билан маъқулланган: ҳудуд аҳолиси лойиҳани қўллаб-қувватлаши керак.
Энергетика вазирлиги Қозоғистонда АЭС қурадиган компания ҳақида ҳали якуний қарорга келмади. Бу бўйича даъвогарлар рўйхатидан тўртта компания жой эгаллаган:
– Хитойнинг CNNC компанияси HPR-1000 реактори билан;
– Жанубий Кореянинг KHNP компанияси APR-1400 реактори билан;
– Россиянинг Росатом компанияси ВВЭР-1200 ва ВВЭР-1000 реакторлари билан;
– Франциянинг EDF компанияси EPR-1200 реактори билан.
Улкен қишлоғи Қозоғистоннинг Балқаш кўли яқинида жойлашган ва Тошкент шаҳридан тахминан 700 км узоқликда.